جريدة ميدان التحرير - [متابعة] - 12 يناير 2019 الساعة 4:08 مساءً

قررت الفنانة المعتزلة عبير الشرقاوي، ابنة المخرج الكبير جلال الشرقاوي، الكشف عن واقعة النصب والاعتداء بالضرب، الذي تعرضت له على يد الفنان محمد سعد.

وروت "عبير" الواقعة، عبر حسابها الشخصي على موقع التواصل الاجتماعي "فيس بوك"، قائلة: "ذكرياتي الموجعة مع محمد سعد، سنه 95 في مسرحية قصة الحي الغربي، بابا جاب لنا محمد سعد مش معروف خالص ودوره في المسرحية دقيقتين في الفصل التاني".

وتابعت "عبير": "دخل وسطينا ونشن عليا، فهم إني طيبة زيادة عن اللزوم وأمي مش مودكاني، عيط لي وحكى ليا إن أبوه وأمه لسة ميتين الأسبوع اللي فات وإنهم ماضيين على شيك بـ2000 وإنه لازم يسددهم وعيط، قلبي وجعني وعيطت جانبه".

وأضافت "عبير": "قلت له اديني 48 ساعة هجيب لك الفلوس، وفعلا الحمد لله وبعد أسبوع لقيت محمد داخل علينا المسرح بعربية فولكس فاجن تحس إنها متركبة على بعض، أنا ساعتها فهمت إنه ركب العربية دي بالنصباية اللي عملها علي، حسيت إني اضحك علي، المهم إحنا كنا متفقين إنه هيبتدي يسدد لي الفلوس لما يقبض من المسرح، ما أنا كمان كنت معتمدة على مرتبي ومحتاجة كل قرش، بس هو طبعًا كان شايفني زي ناس كتير بنت جلال الشرقاوي، عيب يعني إني اتكلم في ألفين جنيه".

واستكملت ابنة جلال الشرقاوي: "فضلت مستنية شهر ورا شهر إنه يبتدي يسدد مفيش، بعد 6 شهور اتكلمت مع مدير المسرح المالي، واتفقنا إنه هيخصم 200 جنيه كل شهر من مرتب محمد سعد علشان يسدد لي الـ2000 على 10 شهور وقد كان".

واختتمت "عبير" روايتها قائلة: "يوم ما اتخصم من محمد أول دفعة وفي أثناء العرض وبعد مشهدي الأول لحظة الانتقال من مشهد إلى مشهد في الظلام، محمد سعد ضربني بالروسية في مناخيري أفقدني الوعي، شكرًا يا محمد على الذكريات الجميلة اللي سيبتهالي، عايزة أقول لك إن المجرى التنفسي بتاع الهوا لسة معووج لحد دلوقتي وهقابلك بيه عند ربنا".